ވާހަކަޅެން: އަކުބަރު ރަސްގެފާނާއި ބީރުބަލް-1

ޠާހާ އަބޫބަކުރު / ލ.ގަން

އެއްޒަމާނެއްގައި އުޅުއްވިޔެ ދަންނަވަންތޯ ރަސްކަލެއް

     އެއްމެނަށް މަޝްހޫރުކަން އެނގި ނަންހިނގާވާ ބޭކަލެއް

ނަންފުޅެއްކަމުގައި ޖަލާލުއްދީން މުޙައްމަދު އަކުބަރޭ

     ނަންކިޔޭ ޝަރަފާއި މަތިވެރި ހައިބަވެތި ބޮޑު ރަސްކަލެއް

މޮޅު ވަކީން ބުއްދީގެ ހިކުމަތް ބީރުބަލް ވަޒީރަކީ

މޮޅުކަމަށް މަޝްހޫރުކަން ބޮޑު ވެސް ނުލާހިކު  ބޭކަލެއް

އަސްތަ އަސްތާ ރަސްގެފާނުން ލޯބިފުޅުވާތީ އެހާ

     ރަސްކަމުގެ ދަރުބާރުގައި  ދެއްވަނީ   މަތިވެރި ޖާގައެއް

ހުރިވަރެއް ބެލުމަށް ވަޒީރުގެ ނިންމެވީ މަކަރެއް ހަދަން

     ކުރިއަކުން  ނޭނގޭނެހެން  ނިންމެވީ މޮޅު    ހިކުމަތެއް

އެންމެފުރަތަމަ އިސްވަޒީރަށް ނާންގަވާ މާސިއްރަކުން

     ދެއްވަވައިފިޔެ ސިއްރުސިއްރުން ކޮންމެ ބޭކަލަކަށް ބިހެއް

ބީރުބަލް އައުމުން ވިދާޅުވެ އިއްވަވައިފި މަހާރަދުން

     މީދުވަސް  ބެލެވޭނެ  ތެދުވެރިކަން ފެނިއްޖޭ  ހުވަފެނެއް

ބުނެވުނޭ އޭ ރަސްގެފާނޭ ބައްލަވާށޭ ޓެސްޓުކޮށް

     ބުނެލުމުން ގެންނާނެޔޭ ފެންގަނޑު ތެރަށް އެރިފައި ބިހެއް

އިންތިޒާމުކުރައްވަވާ ހަމަޖައްސަވާފައިވާ ގޮތައް

     ދިންގެނެސް ލަސްނުވެ ވަޒީރުން ކޮންމެ މީހަކުވެސް ބިހެއް

ބައްލަވަން މިކަމެއް ހިނގާތަން އިންނަވާފައި ބީރުބަލް

     ލައްވަމުން އެވަޑައިގަތީ  ދަރުބާރުތެރެއަށް   ގަދަ އަޑެއް

ބަލަ ވަޒީރާއޭ ކޮބައިތޯއޭ ތިބާ ދިޔަ ބިސް ބަލައި

     ބަލަ ޔަޤީނޭ  ތިޔަދެނީ ކަންފަތްތަކަށް ބޮޑު އުނދަގުލެއް

އިސްޖަހާ ކުރުނީސްކޮށްފައި ބީރުބަލްއޭ ދެންނެވީ

     ވިސްނެވުން ހުއްޓޭ  އިނގޭމީ ހާދަ ހިކުމަތްތެރި ކަތެއް

އައްސަވާށޭ ޤަދަރު މަތިވެރި ލޭފަވެތި މާތް ސާހިބާ

     ކައްކަކާކޯ!  ކިހިނަކުންހޭ  ހާލަކަށް  އެޅެނީ  ބިހެއް

ސާބަހޭ ބުނެލެއްވިޔޭ ހިނިފުޅުވަޑުއްވަވަމުން ރަދުން

     ސާބަހެއް ލިބުމީ އިނގޭތޯ ދަރަޖަވެސް މަތިވާ  ކަމެއް  

             30 ޖެނުއަރީ 2017