ލިޔުނީ: ޠާހާ އަބޫބަކުރު، ލ.ގަން. 12 މާރިޗު
2016މ.
 |
| މިސްކިތެއްގެ ދެވަޅު |
އާބާދީތައް ނެތިގޮސް ބޭނުންކުރުން ހުއްޓާލެވި ފަޅުވެ
ވީރާނާވެފައިވާ މިސްކިތްތައް ޒަމާނުގެ ވަކިތަކުގެ ޝިކާރައަށްވެ ހަލާކުވެ ވެއްޔާއި
ގަލުގެ ފަސްފުނިތަކަކަށް ބަދަލުވެގެން ދެއެވެ. އެއްޒަމާނެއްގައި މީހުން ދިރިއުޅެ
ހޭލަމޭލަވެ ދިރުންހުރި ސަރަޙައްދުވެސް ވާބޯ ޖަންގައްޔަށް ވެދެއެވެ. ދެން މިފަދަ
މިސްކިތްތަކުގެ ތަރާގަނޑާއި ފެންނާންހުންނަ ތަކެތީގެ ބޭނުންހިފަނީ ގެދޮރު
އެޅުމަށާއި ޢިމާރާތްކުރުމަށެވެ. އެގޮތުން މިސްކިތުގެ ވަޅަކީވެސް ބޭނުން ހިފޭ
އަގުހުރި އެއްޗެއްގެ ގޮތުގައި އޮންނަނީ ވެފައެވެ. ހިރިގަލުން ހަދާފައި ހުންނަ
ވަޅުތައް ކޮނެ ނަގައިގެން ގޭގޭގައި ބޭނުންކުރުމަށާއި އަލަށް ހެދޭ މިސްކިތްތަކުގައި
ބޭނުންކުރުމަށް ގެންދިއުމަކީ އިހުގެ އާދައެކެވެ. ނަމަވެސް ފަޅުވެފައިހުންނަ
ސަރަޙައްދުތަކާއި ގުޅުވައިގެން ދެކެވިފައި ހުންނަ ބިރުވެރި ވާހަކަތަކާއި
ޤަބޫލުކުރާ ޤަބޫލުކުރުންތަކުގެ މައްޗަށް ބިނާކޮށް އެފަދަ ސަރަޙައްދުތަކަށް ގޮސް
އެފަދަ ތަކެއްޗަށް ވައިއެޅެން ކެރެނީވެސް މަދުބަޔަކަށެވެ. މިވާހަކައަކީ ގަމުގެ
އިހުގެ މިސްކިތެއް ކަމުގައިވާ "ކިރަހަކުރު" (ކިރުހަކުރު) މިސްކިތުގެ
ވަޅުކޮނެ ނަގަން ދިޔަ މީހުނަށް ދިމާވި ހާދިސާއެއް ކަމަށް އަޅުގަނޑަށް އިވިފައިވާ
ވާހަކައެކެވެ.
ކުޑަކަލޯގެ ދޮންމޫސާގެ އަޙައްމަދުގެ ޔޫސުބަކީ ގަމު
މަތިމަރަދޫ ޒުވާނެކެވެ. ކުޑަކަލޯގެ ހަލީމާގެ ކަމަނާގެ މޫސާގެ އެދުމުގެ މަތިން ކިރަހަކުރު
މިސްކިތުގެ ވަޅު ނެގުމަށްޓަކައި ވަޅަށް އެރުނީ މިޔޫސުބެވެ. ކިރަހަކުރު
މިސްކިތްހުރީ ކޮޅުވޭރު ވެލާނާ ރުއްގަނޑު ކައިރީގައެވެ. ނުވަތަ އެރުއްގަނޑު
ތެރޭގައެވެ. ވަޅުކޮންނަން ވަޅަށް އެރި
އޮއްވާ ނުދަންނަ އަޑަކުން "ތިވަޅުން އަރާށޭ" ގޮވާލުމުން މައްޗަށް އަރާ
ބެލިއިރު އެއްވެސް މީހެއް ނެތެވެ. މިވާހަކަ މޫސަބޭ ގާތު ބުނުމުން މޫސަބޭ އެއީ
ކަމެއް ނޫނޭ މަސައްކަތްކުރިއަށް ގެންދާށޭ ބުނެފިއެވެ. އަނެއްކާވެސް ބިރުންހުރި ޔޫސުބު
އެރުނީ ވަޅުނެގުމަށެވެ. ވަޅު ކޮނުމުގެ މަސައްކަތުގައި ހޭބޯނާރާ އުޅެނިކޮށް އަނެއްކާވެސް
ގޮވާލެވޭ ވަކިދިމާލެއް ނޭނގި ގޮވާލާ އަޑަކުން ވަޅުން އެރުމަށް ގޮވާލެވިއްޖެއެވެ.
ނަމަވެސް މިފަހަރު ބިރުގެންފައި ހުރި ނަމަވެސް އިވޭ ކަމަށް ނުހަދާ ވަޅުކޮނެ
ނިންމާލީއެވެ. ވަޅުން އެރިއިރު ޔޫސުބު ހުރީ ދޫކުރުވެ ވާހަކަ ނުދެއްކޭގޮތް
ވެފައެވެ. މީހާ ހުރި ހުންއައިސް ރަތްވެފައެވެ. ހުންވިހެނުލާ ތިން
ދުވަސްދިޔުމަށްފަހު ޔޫސުބު މިދުނިޔެއަށް އެންމެފަހުގެ ނޭވާލައިފިއެވެ.
މިވާހަކަ އަޅުގަނޑަށް ކިޔައިދެއްވީ ލ.ގަމު
މުކުރިމަގު ފޮނިމާގޭ ޢަލީ އިބްރާހިމް (ކަތީބުގެ އައްޔަ) އެވެ.
No comments:
Post a Comment