ހުކުރުމިސްކިތު ޤަބުރުސްތާނުގައިހުރި ހައްދުންމަތީ ގަމު ޢަލީ ނައިބު ކަލޯގެފާނުގެ މަރިޔާބީފާނުގެ މަހާނަގައު

ލިޔުނީ: ޠާހާ އަބޫބަކުރު

13 ފެބުރުވަރީ 2019މ.

މިކީލަ ހުރީ މާލޭ ހުކުރުމިސްކިތުގެ ޤަބުރުސްތާނުގައެވެ. މިޤަބުރުސްތާނުގައިހުރި އެންމެ ބޮޑު މަހާނަގައު ކަމުގައިވާ އައްސުލްޠާން މުޙައްމަދު ޝަމްސުއްދީން 2 ވަނަ (ފަހުން ފާށަނާކިލެގެފާނު) ގެ މަހާނަފުޅުގެ ގައުފުޅުގެ ހުޅަނގުން އެއްގައު ދޫކޮށްފައެވެ. ރީތި ކުރެހުން ގަނޑެއްހުރި މިގަލުގައިވާ ލިޔުން ލިޔެފައިވަނީ ލޮއި ފޮތްޗެއްގައި އިހުގެ ތާނަ އަކުރުންނެވެ. މިލިޔުމުގައިވާ ބައެއް ސުކުންތައް ކުރުމުގައި މިޒަމާނުގައި ބޭނުންކުރެވޭ ހަމަތަކާ ފުށުއަރާކަން ފާހަގަ ވެއެވެ. "ހަށްދުށްމަތި" އަޅާފައިވާ ގޮތް ވިސްނަވާށެވެ. 7 ފޮޅުވަތަށް ލިޔެފައިވާ ލިޔުމުގެ އަކުރުތައް ހުރީ މިޒަމާނުގައި ތާނަ ލިޔާހެން ކަތިކޮށެއް ނޫނެވެ. އަރަބި އަކުރު ލިޔާހެން ސީދަލަށެވެ.
މިތާގައި ވަޅުލެވިފައިއޮތް ބޭކަނބަލަކީ އެޒަމާނުގެ ޤަދަރުވެރި ބޭކަނބަލެއްކަން މީގައިވާ ލިޔުމުންނާއި ކައިރީގައިވާ މަހާނަތަކަށް ވިސްނާއިރު ދޭހަވެއެވެ.
މި ގަލުގައިވާ ހިޖުރީ ތާރީޚް ދިމާވާ މީލާދީ ތާރީޚަކީ 1758 ޖޫން 14 އެވެ. ހިޖުރައިން ބާރަވަނަ ޤަރުނުގެތެރޭގައި އުޅުއްވި މިޤައުމުގެ ކަމުވޮށިވެގެންވާ މީހުންގެ ތެރޭގައި ހައްދުންމަތީގެ ގިނަ ޚިދުމަތްތެރިން ތަކެއް އުޅުއްވިކަން ތާރީޚުން ސާބިތުވެއެވެ. ނަމަވެސް އެފަރާތްތަކުގެ ހަޔާތާއި ޚިދުމަތާއި ވަނަވަރާއި ދަރިކޮޅު އޮތީ ނުލިޔެވިހުރި ތާރީޚީ ޞަފުހާތަކެއްގައި ފޮހެވި ގެއްލިފައެވެ .ﷲ ސުބުޙާނަހޫ ވަތަޢާލާ އެފަރާތްތަކަށް ރަޙްމަތްލައްވާށިއެވެ. އާމީން.

ތިރީގައިމިވަނީ މިގަލުގައިހުރި ލިޔުން އަކުރުން އަކުރަށެވެ.

"ސަނަތު 1171 
ހިޖުރައިން މިތަށްވަނަ އަހަރު ސައްވާލު މަހު ހަތް ދުވަސްވީ ބުދަ ދުވަހު ހަވަނަ ޝާޢަތު އަލްޤާޟީ މޫސާ ފަޑިޔާރު ތަކުރުފާނުންގެދި އާމިނާއިބީފާނު ބަޑުން ހަށްދުށްމަތީ ގަމު ޢަލީ ނާއިބު ކަލޯގެފާނައް އުފަން މަރިޔައިބީފާނު ނިޔައުވީކަމު ހަދާން."

ފޮޓޯ ނެގީ: 6 ފެބުރުއަރީ 2019މ. ބުދަ ދުވަހު ހެނދުނު 10:27ގައި.