ކުނޑިގޭ ޙުސައިން އިބްރާހިމް ނިޔައުވުން

12 އޭޕްރީލް 2018މ. ބުރާސްފަތި

إِنَّا لِلّهِ وَإِنَّـا إِلَيْهِ رَاجِعونَ

އަޅުގަނޑުގެ ވަރަށް ގާތް ރަޙުމަތްތެރި އަޚެއްކަމުގައިވާ ލ.ގަމު މުކުރިމަގު ފިނިފެންމާގޭ ޙުސައިން އިބްރާހިމް (ކުނޑިގޭ ޙުސޭނުބޭ) މިއަދު މެންދުރު ނިޔައުވި ޚަބަރު އެހީ ފުންހިތާމައާއެކުގައެވެ. ކުނޑިގޭ ޙުސޭނުބެއަކީ ވަރަށް މަސައްކަތްތެރި ބޭފުޅެކެވެ. ފިސާރި ޖެހިލުންކުޑަ ކެރޭ ސަޚުސިއްޔަތެކެވެ. އަޅުގަނޑު ޙުސައިނުބޭ ދަންނަން ފެށީ 1990ގެ އަހަރުތަކުގެ ކުރީކޮޅުގައި އަޅުގަނޑުގެ ބޮޑުބޭބެގެ ދޯނީގައި ކުރި މާލެ ދަތުރަކަށް ފަހުގައެވެ. ޙުސައިނުބެއަކީ އަޅުގަނޑުގެ ކާފައާ ބޮޑުބޭބެއާ ބައްޕަގެވެސް ގާތް ރަޙުމަތްތެރިއަކަށްވާތީ، އޭގެ ފަހުން ގާތް ރަޙުމަތްތެރިކަމެއް އަބަދުވެސް އޮވެއެވެ. އެދުވަސްވަރު އޭނާއަކީ އޮޑިވެރިއެކެވެ. ފަހުން އޭނާ ކުރެއްވި މަސައްކަތަކީ ދަނޑުވެރިކަމެވެ. އެކަމަށް ބޭނުންވާ ފަންނީ އެހީތައް ހޯދައިދިނުމުގައި ވަރަށް ގިނަގޮތްގޮތުން އެހީތެރިވެދިނުމުގެ ފުރުޞަތު އަޅުގަނޑަށް ލިބުނެވެ. އަދި އޭނާގެ ދަނޑުފަގު ގައި މަސައްކަތްކުރާތަން ވެސް ފެނުނެވެ. ފަހުގެ ތާރީޚުގައި ޒަމާނީގޮތަށް ގަމުގައި އެންމެ ފުޅާ ދާއިރާއެއްގައި ދަނޑުވެރިކަން ކުރެއްވި އެއްބޭފުޅެއްގެ ގޮތުގައި އޭނާ ހިމެނޭނެކަން ޔަޤީނެވެ. މަރުބަލީގައި އޭނާ އެނދުމަތިވުމާއި ހަމައަށްވެސް ދަނޑުގެ ހުރިހާ މަސައްކަތެއްގައިވެސް ހީވާގިކަމާއެކު ޙަރަކާތްތެރިވެ އުޅުއްވިއެވެ.

ޙުސައިން އިބްރާހިމް އުފަންވީ 1937މ. ގައެވެ. ނިޔައުވީ އިރު ޢުމުރަކީ 81 އަހަރެވެ. ބައްޕަ އަކީ ދޮންބޭ ގޮލާ (އިބްރާހިމް) އެވެ. މަންމަ އަކީ ދޮންބޭގެ ކުޑަމީހާއެވެ. ޙުސައިން އިބްރާހިމްގެ މަންމަ "ކުޑަމީހާ"އާ އެއްބަފާ މީހުންނަކީ ކުނޑިގޭ އައިސޭ، ކަޅަމަންޖަގެ އިބްރާހިމް އެވެ. ބައެއް ދުވަސްވީ މީހުން ކިޔައިދޭ ގޮތުން މަތިމަރަދޫ "ކަޅަސޮރަ" އިން މަރިޔަމް އަކީވެސް ކުޑަމީހާ އާ ވީ މީހެކެވެ. (މިއާއިލާގެ ވަނަވަރު އިތުރަށް ދިރާސާކުރަންޖެހެއެވެ.)

މާތްﷲ މިމަރުޙޫމްގެ ފުރާނައަށް ފުއްސެވުމާއި ރުއްސެވުން ދެއްވައި ސުވަރުގޭގެ މަތިވެރި ނިޢުމަތް މިންވަރުކުރައްވާށިއެވެ. އަދި އާއިލާއަށް ކެތްތެރިކަން ދެއްވާށިއެވެ. އާމީން.